يوميات صيدلي في الأرياف ... الحلقة 14 ... الحلقة الأخيرة

يوميات صيدلي في الأرياف

الحلقة الرابعة عشر

الحلقة الأخيرة

مسا مسا
أحلى مسا عليكو
خلاص الوقت قرب خالص ... بكرة الحنة
أنا قضيت يومي النهاردة في الصيدلية في كفر سندوس البهواية و أنا بحاول أرتب كل حاجة و أخلص كل الفواتير و الإلتزامات المالية قبل ما آخد أجازتي بتاعة الجواز
انا إديت لنفسي أجازة أسبووووع بحاله
مش حلو كدة و لا إيه ؟
أحسن برضو من حنفي بتاع مسرحية سك على بناتك .. ههههههه
طول النهار من ساعة ماجيت الصبح لغاية دلوقتي عمال أشتغل و أقابل الناس و الشركات و أخلصهم و أظبط كل حاجة و بعد ما خلصت كل الإلتزامات و ظبطت كل حاجة فعلا إديت لسيمان الأجازة بتاعته لمدة اسبوع هو كمان و مشي
بعدها مسكت الورقة و القلم وقلت أكتبلكو بقا الحلقة الأخيرة من اليوميات
فضلت ماسك الورقة و القلم و بحاول أكتب الحلقة الأخيرة و أفكر فيها... راحت جايه لي مكالمة على الموبايل
دي نمرة عهد
- ألوووو ...ازيك يا عروسة ؟
- إزيك إنت يا عريس ؟ إنت فين ؟
- لسه في الصيدلية ما مشيتش .
- يااااه .. إنت قاعد لغاية دلوقتي ليه ؟ بكرة الحنة و لسه أدامك حاجات كتير ما خلصتهاش
- ما أنا كنت قايم خلاص بس كنت بحاول أكتب الحلقة الأخيرة بتاعة اليوميات بس لسه ماكتبتش حاجة لغاية دلوقتي
- عارف ؟ ... يومياتك دي ح أفضل محتفظة بيها لغاية ما ولادنا يكبروا و يعرفو يقروها و ح أقوللهم أبوكو تعب قد إيه علشان تبقوا كويسين و كمان ح أقوللهم إن ربنا كرمه بيا .. و لا إيه ؟ عندك شك يعني ؟
- هههههههه لا طبعا .. معنديش أي شك .. و أنا مستعد أقول الكلام دة لكل الناس من كبيرهم لصغيرهم ... بس إنتي عارفة ؟ انا مبسوط إني كتبت اليوميات دي علشان أعرّف الناس الحاجات اللي بتدور في الصيدليات و كمان علشان يشوفوا مناطق ما شافوهاش قبل كدة و ممكن كمان عمرهم ما يشوفوها و لا تقابلهم .. و كمان أوجه رسائل للناس و للمجتمع
- أهااا ... إنت عملت كدة فعلا
- أنا حبيت اقول للشباب إن لكل مجتهد نصيب و لو أي واحد عاوز يشتغل في العمل الحر ... كل اللي عليه حاجتين .. أول حاجة إنه يشتغل في المجال اللي بيفهم فيه , و تاني حاجة إنه يقعد في شغله و يلتزم و ينضبط و ما ييأسش و لا يملّش و كل حاجة ربنا ح ييسرها له إن شاء الله
- أها المهم يلتزم فعلا ...
- كمان حبيت أقول لرجال الأعمال إنهم عليهم دور مجتمعي ما ينفعش يتخلو عنه و لازم إيديهم تبقا في إيدين الناس علشان نطلع كلنا مع بعض
- أها فعلا .. ناس كتير في مصر بيعملو كدة و ناس أكتر ما بيعملوش
- المجتمع لازم يتكاتف مع بعضه و ما نسمحش أبدا لحد إنه يقسمنا و لا يفرقنا
- طبعا لازم
- و كمان لازم كدولة نشوف مشكلة الإدمان و المدمنين و نحلها
- أكيد
- و كمان لازم الناس تعرف إن كل مكان فيه الحلو و فيه الوحش و لازم نتمسك بالحلو و نحاول نخللي الوحش كويس
- أها و إيه كمان ؟
- و كمان زيادة الوعي في الموضوع اللي إحنا طبعنا له الفلايرات .... فاكرة ؟
- طبعا فاكرة ..
- بس ..
- طيب إكتب .. إكتب كل حاجة و ما تخليش قلمك بخيل .. إكتب و إملا الدنيا كتابة ... و إبعت رسايل للمجتمع و الناس و يا ريت الناس كلها تعمل زيك بالطريقة اللي تعرفها .. أنا مبسوطة بيك
- ربنا يخليكي ليا يا عهد
- و يخليك ليا يا حبيبي ... يا لهوي
- إيه فيه إيه ؟
- الساعة بقت 8 و معادي عند الكوافير 8 و نص و لسه ما خلصتش لبس ....
- هههههههههههههه
- بتضحك ؟ ماشي ماشي ... خلص كتابة و ما تتأخرش علشان وراك حاجات كتير سلام
- سلام
أنا كمان بقوللكو سلام ... و إن شاء الله نتقابل تاني ... يمكن ... محدش عارف ..
ياللا...
دمتم بخير
سلامو عليكو