يوميات صيدلي في الأرياف
مقدمة
السلام عليكم
أنا هاشم .. دكتور صيدلي" يوميات صيدلي في الارياف " دة عنوان الحلقات اللي أنا حابب تعرفوا عن مهنتي من خلالها و حابب كمان أوصل لكم أد إيه الصيدلي تِعب و بيتعب في شغله و حابب كمان أقول " إن الصيدلي مش بياع " " هه الصيدلي مش بياع " ركزوا
ياللا نبتدي على بركة الله
النهاردة يا جماعة أول يوم ليا في الصيدلية بتاعتي في بلد إسمها " كفر سندوس البهواية "
ما تحاولوش تدورا عليها على الخريطة لأنها مش موجودة و كمان الأخ جووجل نفسه ما يعرفش عنها أي حاجة
ليه بقا أنا اخدت الصيدلية هنا ؟
أقوللكو
أنا اخدت الصيدلية هنا علشان أنا مش عارف آخد صيدلية في المدينة علشان طبعا السعر العالي وكمان مفيش اماكن أعرف أعمل فيها صيدليتي
أنا قلت أبدأ في مكان صغير و بعدين أروح براحتي المدينة و معايا الفلوس اللي أقدر أشغلها في الصيدلية الكبيرة بقا
مشيت في موضوع الورق دة و خلصته بس بعد ما طلع عيني ..إمضاءات و مشاوير و رشا.. لا بلاش
دة كل حاجة كانت سهله خالص ... خالص خااالص .. لايكون فيه ميكروفونات و لا حاجة .. خلينا ماشيين جنب الحيطة
المهم في الآخر الحمد لله أنا هنا في صيدليتي في وسط الأدوية و المحاليل و الحاجات اللي إتعلمتها في الكلية
أيوا بقا
الواحد كدة حس إن حياته العملية بدأت
و نفس المجال اللي اتعلمته
إمتا بقا ييجي اول زبون .... قصدي أول عيان
زبون إيه بس يا هاشم ؟؟ إسمه مريض يا بابا
و لا إمتا بقا تيجى اول روشتة ؟
ح احكيلكو بقا عن أول زبون
بس بقا في الحلقة الجاية إن شاء الله .. دمتم بخير
سلامو عليكو
طول عمرك فنان متجدد لكن قوللي اية هو الفارق بين الفيس بوك والمدونة علسان انا لسة ريفي ساذج ؟
ردحذف