يوميات صيدلي في الأرياف ... الحلقة العاشرة ... الموضوع كبير

يوميات صيدلي في الأرياف

الحلقة العاشرة

الموضوع كبير

مساء الخير
إزيكو ؟
النهاردة الخميس
عهد جت تاخد الشفت بتاعها و أنا زي ما قلتلكو قبل كدة عهد بتيجي من هنا و تلاقي الصيدلية اتملت من هنا
أنا كمان رتبت مع الحاج خليل نروح نزور الدكتور حفناوي في بيته
أخدت بعضي من بعد صلاة العشا و رحت للحاج خليل في بيته , و نزل ركب معايا عربيتي و رحنا سوا للدكتور حفناوي , بس عم خليل سابني أدخل لوحدي و مشي هو راح مكان تاني
البيت شكله يجنن من برة و من جوة حكاية .. مش معقولة يكون دة من فلوس شغله في الحكومة
أكيد الدكتور حفناوي دة من عيلة غنية أو دي بقا فلوس الخليج إذا كان إشتغل هناك
إبنه اللي فتح لي الباب البراني و قاللي
- اتفضل يا عمو بابا نازل لك حالاً
الدكتور حفناوي عامل الشقة اللي تحت عيادة و باقي البيت له و لأولاده
دخلنا أوضة الضيوف اللي هي أوضة المسافرين .. زي ما بيقولو عليها هنا في الأرياف و دي أوضة في الشقة اللي تحت .. جنب أوضة الكشف
صالون مدهب بس موضته قديمة شويتين
دخل عليا الدكتور حفناوي يا عيني ساند على العكاز بتاعه
- السلام عليكم يا د هاشم
- و عليكم السلام يا د حفناوي , ألف سلامة عليك , معلش معرفتش أجيلك في المستشفى , اعذرني , أنا مكنتش ناسي , بس و الله انشغلت عنك معلش
- لا و لا يهمك .. كفاية إنك زرتني هنا
- ألف سلامة عليك
أخدنا و إدينا في الكلام ييجي ساعة و لا أكتر .. راجل محترم أوي الدكتور حفناوي دة ..
المهم خرجت من عنده و كان مستنيه في العيادة ست كبيرة في السن و معاها بنت عروسة صغيرة كدة
رحت على الصيدلية
و جتلي فكرة كدة
أنا ليه ما اعملش في الصيدلية خدمة الديليفري ؟
و الله فكرة كويسة
أنا أشتري عجلة لسليمان و أشغله بيها طيار
بس طبعا طيار عادي
علشان كدة مرتبه ح يبقا زي ما هو , يعني مش هيبقا زي مرتبات الطيارين بتوعنا
دخلت الصيدلية و لقيت عهد مش ملاحقة على العيانين . وقفت ساعدتها
و شوية و لقيت مين داخل علينا ؟
الست و البنت اللي شفتهم عند الدكتور حفناوي
- أيوة يا حاجة أؤمري
- معلش يا ابني عاوزة أرجع الحاجات اللي انا أخدتها دي
- ليه يا حاجة إيه اللي حصل ؟
- معلش و النبي .. اصل البت متوترة و لما شافت الحاجات دي خافت و ما رضيتش
- متوترة ؟؟ !!!
الحاجات اللي الست دي كانت عاوزة ترجعهم يبقوا شاش و قطن و أمبولات بنج موضعي و سرنجات و مشرط
أنا الصراحة ما حطيتش في دماغي و رجعتلها الحاجة اللي كانت بتقول عليها و خلاص
بعد ما الست خرجت لقيت عهد وشها بقا أحمر زي الطماطماية
- مالك يا عهد فيه إيه ؟ إنتي وشك متغير كدة ليه ؟
- إنت أخدت بالك من اللي الست دي قالته ؟
- إيه ؟ هي قالت إيه ؟ دي كانت عاوزة ترجع اللي اشترته
- طب ما أخدتش بالك هي ليه عاوزة ترجع الحاجات دي ؟
- لأ .. ليه ؟ هو فيه إيه ؟
- عارف ؟ ... دي كانت ح تبقا عملية ختان
- لا والله ؟ طب إيه الللي خلاكي تقولي كدة ؟ ما يمكن تكون أي جراحة تانية
- إنت ما شفتش الست كان وشها عامل إزاي و هي بتقوللك إن البنت متوترة و ما رضيتش ؟ دي كانت مكسوفة و مش عارفة تتكلم
مش عارف أقول إيه ؟ يمكن عهد عندها حق و يمكن لأ ؟
أنا مش عارف
أصل الروشتة دي عادي ممكن تتطلب في أي جراحة مش شرط موضوع الختان دة
عهد : إنت ح تسكت ؟
- أمال إيه ؟ أعمل إيه ؟
- أنا ح اشتكيه
- تشتكي مين ؟؟ و هو عمل لك إيه ؟
- إنت مش عارف إن الدكتور اللي بيعمل كدة بيتشطب من النقابة و يترفد من شغله ... إنت عارف كمان إن الجراحة دي ما بيدرسوهاش في كلية طب ؟ يا هاشم الموضوع كبير
- أيوة طبعا عارف الكلام دة , بس برضو إحنا مش متأكدين إن الحاجة دي كانت ح تحصل
- طيب روح ورا الست دي و اسألها
- يا سلام .. و انتي فاكرة ان الست ح تقوللي كدة بكل بساطة لو دة فعلا كان صحيح ؟
- إنت ما تعرفش الموضوع دة مؤذي قد إيه ؟
- ليه يا بنتي ؟ هو أنا من كوكب تاني ؟ عارف طبعا
- و انت طيب ح تعمل إيه ؟

- أعمل إيه في إيه ؟ إنتي اللي عندك دي شكوك و بعدين أنا عاوز اقوللك ان الناس دول بيعملو الكلام دة بمزاجهم مش غصب عنهم .. يعني ممكن تبقا مشكلة كبيرة لو اشتكيتي و في الآخر تطلعي إنتي اللي غلطانة
- ما هما بيؤذو بناتهم بايديهم
- هما بيعملو كدة علشان عندهم اللي يقوللهم إن دة صح
- يبقا لازم يحصل توعية لأهل البلد هنا بخصوص الموضوع ده
- أيوة هنا بقا نتفق , عاوزة تعملي توعية إزاي ؟
- إحنا نطبع فلايرات و نوزعها لزباين الصيدلية جوة كل كيس و مع كل روشتة بخصوص الحكاية دي
- و الله فكرة .. معنديش مانع
- خلاص يبقى اتفقنا
- اتفقنا
إحنا صحيح معندناش أي دليل يثبت إن الختان كان ح يحصل بس إحنا مبسوطين أنا و عهد إننا ح نعمل واجب مجتمعي ناحية الناس هنا في كفر سندوس البهواية
لو كل واحد فينا عمل واجب مجتمعي ناحية شارعه أو قريته أو مدينته ح نبقا في مصاف الدول العظمى
ياللا
أقابلكو بقا في الحلقة الجاية إن شاء الله
دمتم بخير
سلامو عليكو