يوميات صيدلي في الأرياف ... الحلقة 9 ... أي عاجة چمال

يوميات صيدلي في الأرياف

الحلقة التاسعة

أي عاجة چـمال

يا مساء الأنوار عليكو

النهاردة حصل موقف جامد جدا ً  

ح أحكيلكو عليه

بس الأول انتو لازم تعرفو إن سمعة الصيدلية مهمة جدا جدا للصيدلي

يعني ما ينفعش أبدا ان الصيدلية يتقال عليها أي كلمة كدة و لا كدة

 و أنا طبعا ما ينفعش اقرب ناحية سمعة الصيدلية و لا أحاول حتى اني أسيب الناس تشك في أي حاجة

و واخد على نفسي عهد إني لا يمكن أصرف أدوية شمال

إنتو فاهمينني طبعا ً

تمام

احكيلكو بقا

النهاردة المغرب بعد ما رجعت من الصلاة دخل عليا واحد أنا ماشفتوش قبل كدة هنا في البلد

-         دجتور  .. مساء الفل يا باچا

-         مساء النور .. اتفضل

الولد دة شكلة كدة مش مظبوط .. شمال يعني

و مجبس دراعه اليمين من أول صوابعه و لغاية بعد الكوع بشوية كدة بس الجبس دة شكله مش سليم .. متبهدل كدة و مش متساوي و لابس كمان سلسلة فضي تخينة في رقابته

و كمان هيئة الولد نفسها مش مظبوطة

-         بقوللك ايه يا باچا انا لسه طالع من المستچفى و عاوز افك الجبس ابن الو.....   دة

-         نعم ؟؟ احنا هنا صيدلية يا ريس .. يعني ما نفكش جبس .. روح المستشفى خليهم يفكوهولك

-         لا يا باچا ما هما مش عيرضو يفكوه

-         ليه يا ريس ؟ مش ح يرضو يفكوه ؟

-         اصلهم لسه مجبسينه النهاردة

-         نعم ؟ و انت عاوز تكفه النهاردة ازاي يعني ؟

-         ما انا زهقان منه يا دجتور و عاوز أخلعه .. انا رعت لعم طلعت النجار علچان يفكهولي بس طلع مابيفهمش

آآآه ياااانا

الشغلانة دي ح توديني السراية الصفرة

-         هو انت كنت عاوز تنشر الجبس عند النجار ؟ و بعدين انت ايه اللي مخللي الجبس دة مش نظيف كدة مع انه متجبس النهاردة ؟

-         اصلي نطيت من فوق سور المستچفى .. مانا هربت منهم .. كانوا عاوزين يكلبشوني في النقطة بتاعة المستچفى

-         كمان ؟

لا دة كدة بقت فل أوي

الواد دة أنا عاوزه يخرج من الصيدلية فورا .. وجوده في الصيدلية شبهة

-         انت اسمك ايه ؟

-         سعيد كزلك . . انت ما تعرفنيچ و لا ايه يا باچا ؟

-         لا والله يا كزلك

-         طب انا دلوقتي أعمل ايه يا باچا .. انا وقعت من السما و انت استلقيتني

-         يا ابني ما ينفعش انشر لك جبس و بعدين انت اللي لازمك  دلوقتي انك تاخد مسكن .. مش تفك الجبس !!

-         ماچي آخد يا باشا ,,, آخد ,, إديني تفاعتين

انتو عارفين ايه هما التفاحتين دول ؟

دة يعني قرصين ترامادول

اهاااا ..... ايوة ..... هو دة

-         بس انا ما عنديش يا ريس

-         طب خليني ابترل و النبي ... يا دچتور اديني أي عاجة چمال

-         يا عم و الله ماليش في الكلام دة .. و هو انت يعني لازم تاخد شمال ؟ .. ما تاخد أي مسكن قوي و خلاص

-         ماچي يا باچا ماچي .. اديني المسكن دة ... أي عاجة علوة من ايدك

-         ايه يا عم ..حلوة ايه ؟؟ .... هو انا ح اعمل لك مكرونة بشاميل ؟

ضحكة جامدة جدا مزيفة طالعة من بقه و بعدين انتهت بصوت طالع من مناخيره

يا رب استرها علينا

المهم جبت له المسكن ( أقراص )

قاللي

-         طب يا دجتور ما ينفعش تفرم لي القرص دة و تدوبهولي في شوية ميه و تديهولي في العرق ؟

السؤال دة لو سمعه أي حد درس في كلية صيدلية .. أقل حاجة ح  تحصل له انه يترمي على الأرض مغمى عليه

يا لهوي على اللي بشوفه ياني

-         يا ريس ما ينفعش اللي انت بتقوله ده

-         طب ماچي ماچي انا عأتصرف بس اديني كمان 4 سرنجات انسولين و سرنجتين أطفال

هههههه لا لا ما يصعبش عليكو ... دة ما عندوش سكر و لا اي حاجة

دول بياخدو السرنجات دي لزوم الضرب

ربنا يتوب على الناس دي كلها و يرحمنا

طبعا انا حمدت ربنا ان الولد دة مشي من هنا 

انا لو كنت فتحت له باب ما كنتش ح أخلص منه و من اللي زيه كل يوم

انا عاوز اقول ان في كل مكان بتلاقي الكويس و الوحش

زي ما بتلاقو صيدليات محترمة و سمعتها كويسة برضو ح تلاقو صيدليات سمعتها السيئة سابقاها

الناس على دة و على دة

بالرغم من إن الحاجات الشمال مكسبها و فلوسها كتير , بس لا برضو , لا يمكن نكون احنا الصيادلة سبب في الفساد المجتمعي دة

احنا اصحاب رسالة

اللي فات دة كله كان بين المغرب و العشا

بعد العشا اتصلت على الحاج خليل علشان نروح نزور الدكتورحفناوي

بس عرفت انه خرج من المستشفى

طبعا انا شكلي بقا وحش

معلش

ح اروح له البيت بكرة ان شاء الله

بكرة الخميس و عهد المفروض انها جاية .. تعقد هي شوية على ما اروح ازوره في البيت

ياللا اشوفكو في الحلقة الجاية

وربنا يبعد عنا و عنكو أي عاجة چمال

دمتم بخير 

سلامو عليكو