يوميات صيدلي في الأرياف
الحلقة الثالثة عشر
القافلة
مساء الفل الأبيض المتوسط ..
إزيكو
عدى 12 يوم من آخر مرة كتبت فيها الحلقة اللي فاتت , و كتب الكتاب قرب و عهد مبقتش تيجي
طبعا مشغولة بترتيب الحاجات بتاعتها و ترتيبات الفرح كمان
حتى أنا مبقتش أقعد في الصيدلية زي الأول ساعات أغيب كدة تلات أربع ساعات و آجي تاني
سليمان برضو بقا خبرة و عادي بقا ممكن أركن عليه
و الله أنا خايف ييجي يوم و يقوللي أنا ماشي علشان أنا ح افتح صيدلية ....
تحصل ...... ليه لأ ؟
المهم و أنا قاعد في الصيدلية دخل الدكتور حفناوي
- الثلام عليكم يا دكتور هاشم
- أهلااااااااااااان دكتور حفناوي ازيك يا دكتور؟ عامل ايه ؟
- و الله تمام الحمد لله
- نشرب شاي بقا ... الشاي ع النار
- إنت عارف أنا مبشربش شاي خليها ينثون
- ههههههههه ماشي تعال نشرب ينسون
دخلنا أنا و الدكتور حفناوي جوة على المكتب
- شوف يا دكتور هاشم أنا عاوز أقوللك على حاجة
- إتفضل يا د حفناوي
- إحنا هنا في كفر ثندوث البهواية بنعمل حاجة إثمها التكافل الإجتماعي .. يعني عاملين جمعية خيرية كدة مننا فينا علشان مثاعدة أهل القرية و دايما بناخد تبرعات عينية أو مادية من الميثورين أو من أي حد عاوز يتبرع
- تمام يا دكتور حفناوي ... دة شئ جميل
- علشان كدة أنا جيت أعرض عليك الموضوع ده
- و ماله يا دكتور حفناوي , و أنا معاكو .. دة واجب مجتمعي لازم كلنا نقوم بيه
- أوكي .. شوف إحنا بنرتب دلوقتي لقافلة طبية .. ح نعملها في مقر النادي الرياضي
- تمام
- إحنا ح نجيب دكاترة متطوعين و ح يكشفوا على الناث ببلاش
- أوكي
- و عاوزينك لو تقدر تثاعد بأي حاجة
- ماشي .. أنا ممكن أساعد بأدوية ... أنا عندي هنا أدوية ممكن أطلعها للقافلة دي يوم ما تعملوها
- هايل دة شئ جميل .. يبقا إتفقنا
- و أنا ح أبعتلك الأدوية اللي أقدر أبعتها مع سليمان النهاردة إن شاء الله
- أيوة بث إيه رأيك تحضر معانا القافلة
- هي ح تبقا إمتا ؟
- بعد بكرة
- اهاااا .. بس أنا ح يبقا عندي عذر
- ليه ؟
- أصل أنا كتب كتابي بعد بكرة
- و الله العظيم ؟ .... ألف ألف مبروك يا دكتور هاشم , و ربنا يتمم بخير إن شاء الله
- ربنا يبارك فيك يا دكتور حفناوي
- طيب خلاث زي ما إتفقنا بقا .. و ح اثتنا منك الحاجة تبعتهالي مع ثليمان
- طب و الينسون ؟
- لا ما خلاث بقا . و بعدين الينثون لما بشربه هنا بيقلب بحاجات وحشة ههههه , نشرب الشربات يوم الفرح ان شاء الله
- ههههه ماشي يا دكتور حفناوي مع السلامة
هايل جدا .. أنا كدة كـ هاشم اتبسطت
طبعا الواجب المجتمعي دة برضو مهم للناس
للّي بيعمله و للّي بيستنفع منه
مش مهم أبدا إنك تكسب وتكبر فلوسك و خلاص
مهم كمان إنك تساعد المحتاج
- سليمان
- أيوة يا دكتور هاشم
- بقوللك .. ح أعمل لك لسته كدة بأدوية من هنا من الصيدلية ح تجيبهم و تحطهم في كرتونة و هاتهملي أراجعهم
- ماشي يا دكتور
المهم عملت له اللستة فعلا و إديتهاله و طلع الأدوية المكتوبة
بس إيه .. تشوفو سليمان دلوقتي ما تعرفوهوش
تحسوا إنه لاعب سيرك بيتحرك على الأرفف و الأدراج و بيجيب الأدوية من غير ولا غلطة
الله يرحم يا سليمان .. فاكرين ؟
راجعت الأدوية اللي في الكرتونة كلها و كله تمام
زي ما فيه حاجات مش كويسة لقيتها و اتكعبلت فيها في كفر سندوس البهواية برضو فيه حاجات كويسة و كان لازم أحكي عنها
كل مكان فيه الحلو و الوحش برضو , و فيه الكويس و فيه الشمال
المهم تعدي إنت من كل دة و ما تلبسشي في أي حاجة شمال
- جوود ايفيننج دكتور هاشم
- خالووووووووو إزيك ؟ حمد لله ع السلامة
دة خالي يا جماعة لسه جاي من أمريكا طازة
كل اللي أعرفه إنه قال إنه ح ييجي يحضر الفرح و ياخد رست في مصر شوية
لكن مكنتش أتوقع أبدا انه يجيلي هنا في الصيدلية
- إنت إزاي جيت هنا ؟
- أنا جيت مع والدك و والدتك , هما في العربية برة .., ياللا ياللا كلوز يور فارماسي آند كم وز مي
- اها طب ثواني يا خالو ... سليمان .. أنا ح اطلع مشوار .. كمل إنت و لو حصل حاجة كلمني و آخر اليوم وصّل الكرتونة للدكتور حفناوي في بيته .. ماشي ؟
- ماشي يا دكتور
بعد إذنكو يا جماعة ..خالي بقا و ما شفتوش بقالي سنين
ياللا أشوفكو بقا في الحلقة الجاية
دمتم بخير
سلامو عليكو
ليست هناك تعليقات:
إرسال تعليق