يوميات صيدلي في الارياف
الحلقة السابعة
روحني شكرا
- ................
- اتفضلي ..خشي اقعدي على المكتب جوة
- ..........
لا يا جماعة ما تفهموش غلط ... عهد مش فاقدة النطق و لا حاجة .. عهد و الله بتتكلم و زي الفل .. بس هي مخزنة الكلام دلوقتي و بتتكلم في سرها مع اللي عمال يوسوس لها في ودانها
- يا سليمان .. هات علبة الكريم اللي موجودة فوق على اليمين اللي نصها أحمر و نصها ابيض
سليمان جاب علبة الكريم و اديتها للمريضة و وصفتلها طريقة الاستعمال و خرجت برة الصيدلية
- اهلا عهد . ؟ عاملة ايه ؟ ايه المفاجأة الجميلة دي ؟
- اهلا بيك انت
- ازيك ؟ طب كنتي قولي و انا اجيبك بالعربية بدل ما تيجي في المواصلات
- .....
- طب ايه رأيك في الصيدلية
- الصيدلية حلوة و زباينها باين عليهم حلوين برضو ؟
- عهد ... ايه ؟
- ايه .. ايه ؟ أنا شفتك بتمسك ايديها
- نعم ؟ و الله ما حصل ؟ انتي بتشوفي حاجات ما بتحصلش و لا ايه ؟
- انت كمان بتستعماني ؟
- ايه يا عهد ؟ ما حصلش حاجة ... دي مريضة زيها زي اي حد بيخش الصيدلية و بعدين افرضي حتى اني مسكت ايديها و لو ان دة ما حصلش .. ايه هو انا مش المفروض اشوف طبيعة المرض ايه ؟ يعني انتي لو بتكشفي على مريض ح اعمل معاكي كدة؟
- انا دكتورة . و حالفة القسم
- يعني انا اللي كهربائي سيارات .. ما أنا دكتور برضو
على فكرة عهد لسه متخرجة من كلية الطب من شهرين بس و بعدها خطبتها على طول .. انا حاولت اخطبها قبل ما تخلص الكلية بس والدها ماكانش راضي أبداً و السبب انه بيقول اني ح اشغلها عن المذاكرة
انا عاوز اقول له بس .. و الله يا عم الحاج دة الفيس بوك بيشغلها اكتر مني
يعني لو خليتني اخطبها و فصلت النت عندكو في البيت كان هيبقا ارحم
- بقوللك ايه يا هاشم .. روحني
- طب دة كلام دة ؟ دة احنا حتى لسه ما قعدناش مع بعض شوية ..
- لا كفاية كدة
- يا بنتي اقعدي شوية ,, افرجك حتى على الصيدلية
- لا مش عاوزة دلوقتي .. ان شاء الله المرة الجاية .. انا عاوزة اروح علشان انا ضغطي مش مظبوط
- طب اقيس لك الضغط ؟ دة انا عندي جهاز ضغط ديجيتال و الله و جميل و بيدي القراية مظبوطة
- انا مش عارفة انت جايب الروقان دة منين .. روحني يا هاشم
طبعا حرصا على المظهر العام انا قبلت اني اروح عهد لبيتها
عهد ممكن تعمل فضيحة ... انتو ما تعرفوهاش .. لما بتتعصب بتقفل عينيها و تفتح بقها على الآخر و بعد ما تخلص زعيق تفقد الذاكرة و تقوللك " انا معملتش كدة و لا قلتش كدة "
خرجنا من الصيدلية قابلني وانا خارج عم هلال
فاكرينه ؟
دة التمرجي اللي شغال عند الدكتور زغلول
- ازيك يا دكتور ؟
- الحمد لله عامل انت ايه يا عم هلال ؟
- الحمد لله .. الدكتور زغلول بيقوللك اديني علبة كريم شعر بالمظ من اللي هي صفيح مش بلاستك و فرشة سنان و تلات علب زيت من بتاع اوكا و اورتيجا و اكتبهم عندك لغاية ما يقابلك ان شاء الله
- يا سليمان .. ادي لعمك هلال اللي هو عاوزه و اكتب لي في ورقة الحاجات اللي اخدها . ياللا يا عهد
ركبت العربية انا و عهد
عهد طول الوقت باصة في الشارع زي ما يكون رايحة المطار و مسافرة امريكا و مصر ح توحشها
- عهد
- ........
- عهد
- ..........
- الوووووووووووو
- عاوز ايه ؟
- لا ولا حاجة .. سلامتك .. انتي مش ح تفكي بقا
- لا مش ح افك
- ليه ؟؟ مش معاكي فكة ؟ هههههههههه
- بايخااا ... بقوللك ... انا عاوزة آجي اشتغل معاك
- نعم ؟
- ايه فيه ايه ؟
- لا مفيش
- امتا اجي اشتغل معاك
- عادي في اي وقت .. بس ليه
- من غير ليه ... . من يوم السبت الجاي انا معاك في الصيدلية و خلاص
دي بقت فل خالص
علشان عهد شافت في الصيدلية واحدة ست .. ح تيجي تشتغل في الصيدلية
هو حد قال لها اني فاتح الصيدلية رجالي فقط و لا حتى اولادي و بناتي
دي هتبقا أيام ايييه ... يا منجي من المهالك يا رب
ربنا يسترها
بيني و بينكو انا قبلت بالموضوع دة لاني افتكرت ان القعدة جنب الدكتور حفناوي مش ح تبقى ظريفة خاالص
و اهو عهد برضه تشوف الادوية و تعرف تتعامل مع الناس في البيع و الشرا و انا عارف انها هتزهق بسرعة
- طب يا عهد بالنسبة للرسالة اللي انتي شغالة عليها
- انا اعرف اوفق بين كل حاجة
- اوكي ماشي ... اهلا بيكي يا عهد في كفر سندوس البهواية
وصلت عهد لغاية البيت و رجعت تاني الصيدلية
الحمد لله عدي اليوم على خير و كل واحد روح بيته و لسه سليم زي مانا
ياللا اشوفكم بقا في الحلقة الجاية
دمتم بخير
سلامو عليكو
ليست هناك تعليقات:
إرسال تعليق