يوميات صيدلي في الارياف
الحلقة الثامنة
شيـِّـلني و أشيـِّـلك
السلام عليكم
أخباركو ايه ؟
تمام ؟
الحمد لله
انا النهاردة ح اقولكو على اللي حصل في الأيام اللي فاتت
في البداية كدة انا بقالي شهر من ساعة ما عهد كانت هنا و قررت إنها تشتغل معايا في الصيدلية و اتفقنا خلاص بس طبعا علشان ظروف رسالتها اللي بتحضرها ما قدرتش تيجي الصيدلية كل يوم
بس هي ثبتت يومين بس تيجيهم في الصيدلية , يوم الاثنين و يوم الخميس من كل اسبوع
انا عاوز اقوللكم ان وجود عهد في الصيدلية حركها كتير خصوصا لما ستات البلد عرفو انها شاطرة في تخصص الاطفال دة و بقوا ييجو بأطفالهم يكشفو و ياخدو الدوا من هنا
بصو هو طبعا دة غلط
المفروض الدكتور يكشف على الطفل في العيادة مش في الصيدلية
بس احنا هنا في الارياف .. حيث كل شئ متاح ..
انا عاوزكو تعرفو بس ان الدكتور ناشي اللي هو الحوت بتاع البلد دي اللي انا حكيتلكو عليه قبل كدة في الحلقة التالتة بيعمل كل حاجة في الصيدلية بتاعته .. بيخيط جروح و بيجبس و بيعمل جلسات بالنيبيولايزر ( اللي هو جهاز الاكسجين ) و اقولكو على حاجة كمان ... الدكتور ناشي عنده سرير في الصيدلية لاي حد محتاج يعلق محلول
انا عارف انكو ممكن تقولو
لا لا لا دة كدة كتير ,, اكيد دة أوفر , انت بتبالغ
بس و الله دة بيحصل في الارياف
و بمناسبة بقا اننا في الارياف انا النهاردة ح احكيلكو على الدعاية الطبية في الارياف
و للي ما يعرفش الدعاية الطبية بتفاصيلها ح احاول اشرح لكو يعني ايه الشغلانة دي
في حاجة اسمها شركة الادوية و فيه حاجة اسمها المكتب العلمي
الفرق بين شركة الادوية و المكتب العلمي ان شركة الادوية ليها مصنع بيتم فيه تصنيع الادوية اللي هي باسمها او باسم حد تاني , يعني تصنيع للنفس و للغير أما المكتب العلمي مالوش مصنع باسمه و بنسبة تمانين في الميه هو دة الغير و ال العشرين في المية التانيين شركات برضه بس بظروف معينة زي مثلا خط الانتاج مش مكفي الانتاج و مش قادرين يحطو في السوق الكمية المطلوبة كلها فبيصنعوا لدى الغير .. دة كمثال بس
شركات الادوية مقسومة قسمين
شركات ادوية عالمية ( متعددة الجنسيات يعني ) و وشركات ادوية محلية ( استثمار مصري ميه في الميه )
و علشان الادوية بتاعة الشركات و المكاتب دي تشتغل في الصيدليات كويس و تتباع لازمها تيم دعاية طبية
بيعمل ايه بقا تيم الدعاية الطبية دة ؟
اقوللكو
ممثلين الشركات و المكاتب دول ( المندوبين يعني ) بيروحو للدكاترة في عياداتهم و بيكلموهم على الادوية بتاعة الشركات بتاعتهم و كمان بيقنعوهم انهم يكتبو الادوية دي في روشتاتهم و ما يكتبوش الادوية المنافسة ليهم
و دي حاجة مش سهلة على فكرة
الناس دول بيزورا الدكاترة في عياداتهم و في المستشفيات و في المستوصفات و في كل مكان علشان يخللوهم يكتبو ادويتهم و بالتالي الصيدلي ح يوفر الادوية دي في الصيدلية
هو دة الاستاندارد
انا مش ح اقوللكو على الحاجات التانية اللي هي مش استاندارد دلوقتي
ح تعرفوها في آخر الحلقة
غالبا شغل الدعاية الطبية في الارياف بيحتاج مندوب مش مندوبة علشان بيبقا بالليل مفيش شغل في الارياف الصبح الا الوحدة الصحية و المسافات اللي بين المدينة و الارياف بتبقا مقطوعة بالكامل و فيه خطورة كبيرة على المندوبة
انا قدمت لكو المقدمة دي علشان احكي لكو على المندوب اللي جاني النهاردة
دخل الصيدلية شاب في العشرينات لابس بدلة كاملة و كرافتة كلهم مع بعض شكلهم آخر شياكة
سلم عليا و عرفني بنفسه على ان اسمه محمد من شركة مش ح اقوللكو على اسمها , بس هي شركة متعددة الجنسيات ( عالمية ) , و عرفني على الادوية اللي هو شغال عليها
اسم الدوا اللي شغال عليه ( مجازا مجازا مجازا ) اسمه شرمبكس كبسول ... ماشي ؟ يمشي معاكو الاسم دة ؟
ياللا شوفو بقا الحوار اللي دار بينه و بيني , بس دة بعد ما اتعرفنا على بعض
- طب قوللي بقا يا د هاشم اخبار شرمبكس كبسول ايه بقا ؟
- شرمبكس يا د محمد مش شغال كويس و محدش بيكتبه
- طب امال الدكاترة هنا بيكتبو ايه ؟
- كل حاجة يا دكتور بس شرمبكس كبسول لأ
- طب مين هنا ممكن يكتبه
- عليك بقا و على الدكتور زغلول . هو اللي ح يقدر يفيدك
- ماشي يا دكتور انا رايح له
راح صاحبنا مندوب شركة الادوية للدكتور زغلول و بعد ساعة تقريبا رجع لي
- دكتورهاشم ازيك ؟
- الحمد لله
- انا رحت للدكتور زغلول و زرته و الراجل اقتنع كتير بالدوا و عاوزك توفره في الصيدلية
- هو قاللك كدة
- ايوة و كتب لك الورقة دي
الورقة دي يا جماعة مكتوب فيها ارجو توفير شرمبكس كبسول في الصيدلية 100 علبة و تحتها امضاء الدكتور زغلول
طبعا انتو كدة فهمتو .. ليه الدكتور زغلول كتب الورقة واشمعنا 100 علبة بالتحديد
- طيب تمام يا د محمد اعمل الاوردر 50 علبة و لما يخلصوا نجيب 50 تانيين
- لا يا دكتور خليك في ال 100 احسن علشان شريحة البونص و الخصم دة ال100 علبة عليهم 10 علب بونص
- لا مش مهم البونص و الخصم انا اهم حاجة ان الدوا يمشي من عندي و الفلوس تتلكود
- ما تقلقش يا دكتور كله ماشي ان شاء الله
- لا برضو خمسين كفاية
- طب يا دكتور خد ال 100 و ح نزود لك في البونص شوية .. بدل ما يبقو 10 علب نخليهم 15
- لا 25
- كتير يا دكتور اوي
- خلاص 20 و دة اخر كلام
- ماشي يا دكتور هاشم عشرين عشرين مش مشكلة
- خللي بالك التواريخ لازم تكون بعيدة
- سننتين يا دكتور .. اوكي ؟
- اوكي .. هات ال100 علبة
بعد كدة بحوالي نص ساعة جاتلي مكالمة من د زغلول
- دكتور هاشم ... كيف حالك ؟
- و الله تمام يا دكتور زغلول
- جالك المندوب ؟
- ايوة يا دكتور و عملت الاوردر
- طيب تمام ... انا عاوز اقوللك ان انا اشترطت عليه يحط ال100 علبة عندك كلهم و انا ح اخلي الناس هنا يشتروه منك ... مش كدة احسن ؟
- اها تمام يا دكتور ....
- طب ابعت مع سليمان ... علبتين تلاتة غسول اسنان و علبتين لبن أطفال مدعم
عرفتوا بقا يعني ايه شغل مش ستاندراد ؟
هو دة اللي كنت عاوزكم تعرفوه
اوعو تكونو فاكرين اني فرحان بحاجة زي كدة , بالعكس انا زعلان للحال اللي وصل له سوق الدعاية الطبية و الطب و الصيدله عموما
الكلام دة مكنش موجود زمان على فكرة .. دة فكر جديد علينا و مش من طبعنا و لا اسلوبنا
ياللا اشوفكو في الحلقة الجاية
دمتم بخير
سلامو عليكو
ليست هناك تعليقات:
إرسال تعليق