يوميات صيدلي في الأرياف
الحلقة 3
حبيبي يا أبو آية
مسا مسا
ازيكو ؟ النهاردة عاوز أكمل لكم رحلة زيارتي للدكتور زغلول ( بتاع كله )
أنا يا جماعة شفت المنظر اللي حكيت لكم عليه في الحلقة اللي فاتت جوة أوضة المسافرين .. قصدي أوضة العمليات اللي أنا دخلتها في العيادة .. قصدي في الخرابة بتاعة دكتور زغلول و حسيت إن فيه حاجة غلط في الناس دي أو يمكن الغلط فيا أنا و في اللي انا اتعلمته في الكلية .. مش عارف إيه دة ؟
شديت كرسي فعلا زي ما الدكتور زغلول طلب مني و قعدت جنبه و هو منهمك أوي في العملية اللي شغال فيها
- دكتور زغلول انا حبيت آجي أقعد معاك شوية و أتعرف عليك بس هو الواضح إنك مش فاضي
- لا يا دكتور هاشم .. عادي .. إنت مش معطلني
- و النبي يا أبو آية خد بالك يسعدك
الجملة اللي فاتت دي مش أنا يا جماعة اللي قلتها و الله .. دي الست أم البنت اللي واقفة عند آخر التروللي ,, و أكيد آية دي تبقى بنت الدكتور زغلول .. مش محتاجة ذكاء حاد يعني ,, بس الصراحة الراجل طقّم لها علشان برضو البرستيج بتاعه اللي وقع على الأرض و اتكسر 100 حته أدامي دة .
- طب يا دكتور زغلول أنا لسه فاتح الصيدلية من كام يوم كدة .. لسه ما كملتش الأسبوع و جالي من حضرتك روشتة امبارح .. بس كنت عاوز أعرف إنت حضرتك تخصصك إيه بالظبط ؟
- ليه ؟
- يعني .. علشان أركز معاك في الصيدلية و اوفر لك الأدوية اللي بحتاجها في شغلك
- إنت قريت اليافطة اللي برة على الباب ؟
- أيوة فعلا بس أكيد فيه تخصص غالب على شغل حضرتك
- دكتور هاشم .. انت عاوز ايه بالظبط ؟؟
- إطلع بقا يا أحمد .. يا أحمد
مش أنا و الله و لا الست اللي واقفة عند آخر التروللي . . المرة دي الموبايل بتاع دكتور التخدير .. الراجل طلع الموبايل و شغال ع اليوتيوب
- ولا حاجة خالص يا دكتور زغلول .. حضرتك ليه قافش ؟
- انت بتبيع بكام في اليوم يا دكتور هاشم
- ستمياية كدة
- طب حلو .. مش وحش
- إزاي بقا يا دكتور .. و هو دة ينفع ؟
- بصراحة الدكتور ناشي مش مخليني عاوز حاجة
يا جماعة الدكتور ناشي دة هو ( الحوت ) بتاع القرية .. واكلها والعة من كله .. مرضى و دكاترة و شركات و بصراحة كان هو كل خوفي وأنا بفتح الصيدلية لما سمعت عنه قبل ما ابدأ شغلي في كفر سندوس البهواية
- طب يا دكتور زغلول .. حتة من التورتة .. أنا مش طماع
- ما تجيبش وشي يا أحمد
دة برضة الموبايل ... الله يخرب بيتك امال لو في صالة ديسكو هتشغل ايه ؟
- شوف يا عم هاشم روح صيدليتك و أنا هبعتلك هلال آخر الليل
- ماشي يا أبو آية .. هههههههههه..... بهزر..... بهزر ... سلام يا دكتور زغلول
خرجت من الأوضة لقيت واحدة بتقوللي : ايه يا دكتور ؟ خلاص راشا فاقت ؟
هي الظاهر مش مركزة و أصلاً أنا شكلي مش شكل دكتور التخدير اللي قاعد مع الموبايل بتاعه جوة هو وأحمد
رجعت الصيدلية لقيت سليمان واخد الكرسي و قاعد بيه برة على باب الصيدلية , ما هي ناقصاك يا سليمان
- إيه يا سليمان ؟ إنت حران و لا إيه ؟
- لا والله يا دكتور انا قلت افك شوية في الهوا ..
- آه .. طيب .. الله يجازيك يا عم خليل
- ايه الاخبار يا سليمان ؟ حد جه و انا مش هنا ؟
- آه بنت ابو مسعود جت عاوزة حقنة البرد بس انا معرفهاش و الحاج متولي جه و كان عاوز يقيس الضغط بس انا مبعرفش و الست نبوية مرات عبد الله العجلاتي كانت عاوزة تقيس السكر بس انا مبعرفش
- اماال انت تعرف ايه يا سليمان ؟
الله يجازيك يا عم خليل ؟ بس لما اشوفك
واضح ان سليمان هيعلي الضغط بتاعي و هيجيبي السكر كمان , بس انا كمان لازم اخللي الحاج خليل ينفذ اتفاقه .. الموبايل فين ؟
- سليمان .. نمرة خالك الحاج خليل كام ؟
- اهي يا دكتور على الورقة دي .. انا شايلها دايما في جيبي
- الووو .. ايوة يا حاج خليل .. ازيك ؟
- انا دكتور هاشم يا حاج
- اهلا بيك يا عم خليل
- سليمان ؟ لا سليمان مافيش مشكلة ان شاء الله بس انا ماشفتش حاجة لسه يا حاج خليل
- لا والله ؟ بجد ؟ هتيجي انت و الدكتور حفناوي النهاردة الصيدلية ؟ .. ماشي ماشي مستنيكو
- لا ما تقلقش الشاي و القهوة موجودين .. ياللا سلام
خلينا وراك يا عم خليل لما نشوف هتودينا لغاية فين
ح احيلكو بقا على اللي حصل مع الحاج خليل و الدكتور حفناوي ..
في الحلقة الجاية بقا
دمتم بخير
سلامو عليكو
ليست هناك تعليقات:
إرسال تعليق