يوميات صيدلي في الأرياف
الحلقة الثانية عشرة
إقفش
مسا مسا
إزيكو ؟
النهاردة ح أحكيلكو على موقف حصلي إمبارح و اكتشفته النهاردة
امبارح بالليل و انا خلاص بقفل الصيدلية انا و سليمان جالي اتنين راكبين موتوسيكل و لما شافوني بقفل الصيدلية وقفو جنبنا و واحد منهم نزل و قاللي
- معلش يا دكتور بالله عليك تفتح تاني الصيدلية انا مش لاقي حد فاتح واقرب صيدلية خدمة ليلية لسه بعيد , عاوز الدوا دة ضروري علشان امي تعبانة و الدوا دة اللي بيريحها و بيخليها كويسة
- دوا ايه دة ؟
- دة مسكن يا دكتور .. بالله عليك تفتح الصيدلية من تاني
عارفين يا جماعة دة لو دوا ينفع يتأجل مكنش ح يبقى فيه مشكلة لما اخليه لبكرة لكن المسكن بالذات حاجة صعبة ان المريض يقضي الليل او حتى جزء من الليل بالوجع
أنا طبعا فتحت الصيدلية من تاني بس المرة دي من غير ما اشغل النور لاني عارف مكان الدوا اللي الاخ دة عاوزه ... عادي يعني و دخلت على طول و اديت له الدوا و اداني 100 جنيه و قاللي : معاييش فكة و الله
انا كمان لسه ح افك الفلوس ؟
ع السريع كدة اديته الباقي و مشي و قفلت أنا و سليمان و مشينا
أقوللكو بقا انا اكتشفت ايه النهاردة
انا لسه داخل الصبح لا بيا و لا عليا و بفتح الدرج لقيت ايه بقا
لقيت ال100 جنيه بتاعة صاحبنا بتاع امبارح .. بس شكلها غريب
متغير شوية .. فيها حاجة غلط
أخدتها كدة و بصيت لها لقيت ألوانها غريبة .. تؤ .. شكلها مش مريحني
طلعت 100 جنيه من جيبي و قارنت الاتنين ببعض
اوباااا .... إقفش ... ال 100 جنيه طلعت مضروبة .. مزورة .. اة و الله ..
بقا كدة ؟؟ دة كلام يا جدعان .. يعني الواحد يعمل ايه بس ؟
على فكرة انا فاكر شكل الاتنين دول
بصوا .. أنا رحت عملت محضر في القسم ..
و الضابط الصراحة عمل الواجب و زيادة
الراجل عمل كل حاجة بجد ... فتح المحضر و اخد الاوصاف و حرز الفلوس و قاللي خلاص يا د هاشم روح انت و احنا هنقوم باللازم و لو وصلنا لحاجة ح نديك تليفون
ياللا ماشي كله خير
بعد ما خرجت من القسم نزلت المدينة اشتري شوية أدوية و مستلزمات للصيدلية .. تقريبا حوالي ساعتين قضيتهم في شراء النواقص بتاعة الصيدلية و شوية و لقيت تليفوني بيرن , رديت لقيت سليمان بيقوللي تعال بسرعة يا د هاشم فيه هنا ناس من الحكومة و عاوزينك
انا استغربت اوي
معقول الحكومة جابت العيال بتوع ال100 جنيه بسرعه كدة
واضح ان الشرطة هنا مسيطرة ع اللآخر .. اكيد كمان ان الارياف مش ح تبقا زي المدينة وح تكون صغيرة و محكومة
وصلت الصيدلية و دخلت جوة لقيت اتنين رجالة قاعين بيشربو الشاي مع سليمان
انا شديت كرسي و قعدت معاهم
- سلامو عليكو
- و عليكم السلام ( جماعة )
- انا د هاشم صاحب الصيدلية
- اهلا يا دكتور احنا من المديرية جايين نعمل تفتيش على الصيدلية
- اها .. اهلا و سهلا
شفتو ؟ اهو احنا جبنا سيرتهم في الحلقة اللي فاتت .. جم أهم على السيرة .. ربنا يجعل كلامنا خفيف عليهم
و انا اللي كنت فاكرهم من الداخلية
- عاوزين منك يا د هاشم الورق و التراخيص و افتح لنا الثلاجة
- أة طبعا طبعا اتفضلو كل حاجة في السليم فتشوا براحتكو
الاتنين دول بداو يشوفو اصناف التلاجة و كمان يدعبسو كدة في الارفف
سليمان : هو فيه ايه يا دكتور ؟
انا : لا ولا حاجة متخافش يا ريس كله تمام احنا معندناش حاجة نخبيها
سليمان : طيب يا دكتور بدل الدعبسة دي ما تشوفهم و خلاص
انا : اسكت الله يخربيتك ح تودينا في داهية .. الناس دول مش بتوع الكلام دة
اقفش
الكلمة دي طلعت من واحد منهم و هو ماسك علبة طلعها من وسط العلب في رف الأمبولات
أنا : ايه في ايه ؟
مفتش 1 : اكسباير و تاريخها 2013
انا : ازاي الكلام دة ؟
مفتش 2 : وريني كدة ...لا يا ريس دة تاريخها 2018 بس ال 3 قريبة من ال 8 بالانجليزي انت بس ما اخدتش بالك و بعدين هو فيه علبة تاريخ انتاجها 2015 تخلص في 2013
انا : اها .. الحمد لله .. تمام
الناس بتوع التفتيش خلصوا و كتبو محضر التفتيش و مضوا و مضوني عليه
انا : تمام ؟ .. شغل على ميه بيضا ؟
مفتش 1 : تمام طبعا الا بقوللك ايه يا دكتور
انا : اؤمرني
مفتش 1 : انا عاوز منك علبتين من الانسولين اللي جوة في التلاجة دة
انا : آة و ماله و ماله .. ح تدفع كام ؟ ههههه بهزر و لا يهمك ... طب اوكي .. حاجة تانية ؟
مفتش 1 : اة و النبي اديني اختبار
انا : سكر ؟
مفتش 1 : لا حمل ؟
مفتش 2 و انا في نفس واحد : نعم ؟
مفتش 1 : اة يا جماعة .. دة لمراتي و لا مؤاخذة
انا : اة ماشي ماشي معلش ... اقفش .. قصدي اتفضل
مفتش 1 : شكرا يا دكترة .. لو عزت اي حاجة من المديرية تعالالي بس انا ح اعمل معكا الواجب كله
انا : اة طبعا طبعا ان شاء الله
كدة الحمد لله عدت على خير
على فكرة في الغالب مفيش حد بيعمل زي المفتش دة بس دة يعتبر من شواذ القاعدة
مفيش أحسن من المشي السليم و ربنا يبعدنا عن الحرام
كفاية تنشنة بقا و اقوللكو على خبر حلو
كتب كتابي على عهد بعد اسبوعين ان شاء الله
الفترة الجاية ح تبقى زحمة أكيد و ان شاء الله تعدي على خير
اشوفكو في الحلقة الجاية
سلامو عليكو
ليست هناك تعليقات:
إرسال تعليق